રે! નદી , તને પણ બાંધી?

રે! નદી , તને પણ બાંધી?

જીવ નીચોવ્યો,શ્વાસ નીચોવ્યા
અંધારા-અજવાસ નીચોવ્યા
પછી મળીતી અમને એ આઝાદી
તારે મુક્તિ હોય જોઇતી જલ્દીથી તું તાર કરી દે
નામ લખી લે – મોહનદાસ કરમચંદ ગાંધી

તારા ઘરમાં તારી રીતે રહેવાનું પણ નહી?
વહેવું તારો ધર્મ : ધર્મમાં વહેવાનું પણ નહી?
જઈ ઝાડની પાસે કશું કહેવાનું પણ નહી?
અખંડ જળની ચાદર કોણે થીગડાઓથી સાંધી?
રે!નદી,તને પણ બાંધી?

પટ્ટે બાંધી ફરતા લોકો નાનકડા સંતાન
સુગંધની મહેફિલમાં ભોળા ફૂલોનું અપમાન
હાથકડી પહેરીને લહેરો ક્યાંથી ગાશે તાન
તોડ બધાય બંધન,આપું ખોબે ખોબા આંધી
રે!નદી,તને પણ બાંધી?

એકથી અનંત

ચાલ પિંકુ ,તને એકથી અનંત ગણતાં શીખવાડુ
મમ્મી, એ કેવી રીતે?
આપણે તારા ગણીએ

મમ્મી, હું તો સૂઇ જાઉ છુ, ઉંઘ આવે છે
પછી એ ગણવા બેઠી

ગણતાં ગણતાં વચ્ચે વાદળ આવી ખડખડ હસી પડ્યાં ને ભૂલ પડી
ગણતાં ગણતાં ઝબક ઝબકતાં તારા ધડધડ ખરી પડ્યાં ને ભૂલ પડી
ગણતાં ગણતાં મંદ ચાલ લૈ ચાંદ ચાંદની ફરી વળ્યા ને ભૂલ પડી

સવારે રાતીચોળ આંખો જોઇ
પિંકુએ ધીરજ ખોઇ

મમ્મી કેટલા દિવસથી તારા ગણે છે?
કેટલા દિવસ ગણીશ?

એ તો આપણને છોડી ગયેલા તારા પપ્પા આવશે ને ત્યાં સુધીમાં
તો ગણાઈ જશે.

એટ્લા માટે તુ એકથી અનંત ગણે છે..મમ્મી?

ગઝલ

ખેરવી નાખે જ તારાં પાન તો તુ શું કરીશ ?
ખીલવાનું દે પછી આહ્વવાન તો તુ શું કરીશ ?

વેશ સાધુનો લૈ તું બ્રહ્મચારી થાય પણ
જાગશે તારા મહી શેતાન તો તુ શું કરીશ ?

એમને મુઠ્ઠી ભરી તુ શાપ દેવા નીકળે
એ તને જો આપશે વરદાન તો તુ શું કરીશ ?

કાલ જેને તે હણ્યો તે સત્યવક્તા હુ હતો
રુબરુ આવી કહે ભગવાન તો તુ શું કરીશ ?

જિંદગી વાંચીને તારી એ કરે જો ફેસલો
ભાગ્યમાં તારા નથી અવસાન તો તુ શું કરીશ ?

 

ફોન : ૯૮૬૯૯ ૨૯૦૮૯

બૂટાલા હાઉસ – 4

લઘરવઘર મુફલિસ
મંદિરની બહાર
સહુના બૂટને જોતો ધારદાર

ચોર ચોરની બૂમો
અપશબ્દોનો વરસાદ
મારો મારોનો નાદ

બહુ સિફ્તથી છટકી…આગળ જૈ અટકી
કશેક વળી ગયો
પૂજારીએ ભકતોને પુછ્યુ
દાઢી હતી?…આંખોમાં ચમક હતી?
ટોળૂ ગુસ્સામા.. હા બોલ્યુ

પૂજારીએ નિ:સાસો નાખ્યો :
કાલે જ ઇશ્વર સપનામાં કહેતા હતા
તારા દ્વારે આવીશ અને હડધૂત થૈ ને જૈશ

ટોળુ ઇશ્વર જેવા ઇશ્વરને ભગાડી મુક્યાની
કિકિયારીઓ કરતુ ગર્વથી નીકળી ગયુ

બૂટાલા હાઉસ – ૩

“દર્શનના સમય પછી પ્રસાદીમાં બૂટ આપવામાં આવશે”
જાહેરાત પછી
પૂજારીના ફોન ઉપર રીતસરનો ધસારો
કંઇ કંપનીના?
અમારી સાઇઝના ખરા?
બાળકો માટે શુ?
લાઇનમા ઉભા રહેવાનુ કે ટોકન વ્ય્વસ્થા?
કેટલા વર્ષની ગેરેંટી?

પણ ૧૦૦ ટકા ગેરેંટીવાળા ઇશ્વર વિશે
પૂજારીને કોઇએ પુછ્યુ જ નહી કે
દર્શનનો સમય કેટલા વાગે?

બૂટાલા હાઉસ – ૨

મંદિરની બહાર એક બાબા
ચમત્કારીક આપે છે રાખ
ચપટી રાખ બૂટમાં રાખવાથી બૂટ ક્દી ચોરાતાં નથી
શરત એટ્લી કે ઘરમાં જ કાઢ્વાના

રાખના ઢગલા ઉપર બેઠેલા
રાખ લેવા કતારો લગાવે છે
ઇશ્વર કરતાં બાબાના ભકતો વધી રહ્યા છે

બાબાએ રાખ આપી આપી મંદિરથી દૂર
બૂટ બનાવવાની ફેકટરી ખોલી નાખી છે

ને એક કવિ કીડીના ચંપલ કેમ સિવાય
એની મથામણમા કેટ્લીય રાતોથી સૂતો નથી

બુટાલા હાઉસ

ચરણને બદલે ….બૂટની ચીંતા
કરતાં કરતાં પ્રવેશ કરતાં મંદિરમાં
કોઈ વળી પગમાંથી કાઢી મન ઉપર પહેરી
ડરતાં ડરતાં પ્રવેશ કરતાં મંદિરમાં
કોઈ કરતાં કાલાવાલા…ધ્યાન બૂટનુ રાખજો વ્હાલા
કોઈ વળી એવી ચીંતામાં..બીજાના પહેરી તો લેશુ..કિંતુ માપમાં નહી આવે તો?
કોઈ ફાટલા સોલ સમી ફરિયાદો લાવે
ક્યાંક આત્મા શરીરથી નીકળી જાવાની બીકે કહેતાં
ખીલ્લી ક્યાંક લગાવો વ્હાલા..શરીર આત્મા ચોટી રહે ને..
ખુલ્લા પગના ખુલ્લા મનના ઈશ્વર સહુના
બૂટ પ્રોબ્લેમ ઉકેલે
સૂટ પ્રોબ્લેમ ઉકેલે
અખૂટ પ્રોબ્લેમ ઉકેલે
ભવિષ્યમાં મંદિરને બદલે બીજુ નામ આપવુ હોય તો
બુટાલા હાઉસ રાખી શકાય?